brezhoneg

Hag a nevez ?

· AR REDADEG E PLOUHA :

Tremenet e oa Ar Redadeg evit ar brezhoneg e Plouha, d’al Lun 14 a viz Mae. Prenet e oa bet ur c’hilometr digant Diwan, gant Kalon Plouha. Meur a reder eus hor c’hevredigezh o doa douget ar vazh... Sellit !

Trugarez da Jorj Gevel (Kalon OF Plouha !)

evit al luc’hskeudenn gaer-mañ...

· KENTEL OUZHPENN (3 eurvezh d’ar Sadorn vintin) :

Adkroget eo gant ar stajoù miziek ar bloaz-mañ... dizoloet e vo ur bern traoù c’hoazh gant ar re a zeuio : distagadur, kanaouennoù, barzhonegoù, testennoù, danevelloù ha levrioù... ha kement-se, E BREZHONEG EVEL-JUST !

En em adkavet oamp da seurt keñver, d’an 8 a viz Here 2011, evit ur gentel distagadur ; d’an 10 a viz Kerzu e oa bet komzet diwar-benn Añjela Duval ha studiet barzhonegoù diganti... ha d’ar 4 a viz C’hwevrer hor boa studiet testennoù (barzhoneg, pennad, lizher) digant Anjela Duval adarre. D’an 31 a viz Meurzh hor boa kroget da studiañ "Pirc’hirin ar Mor" digant Roparz Hemon, ha kendalc’het d’an 12 a viz Mae : pegen dedennus !

Ar gentel ouzhpenn gentañ a vo d’an 16 a viz Even 2012, etre 9e00 ha 12e00 : DEUIT NIVERUS !

· GOUELIOÙ E GOUELOÙ :

Gouelioù (ar brezhoneg) e Goueloù a vo c’hoazh er bloaz-mañ, adalek ar 6 betek an 10 a viz Eost 2012 gant :

- Stal-labour war ar c’hoariva gant Bob Simon e-pad 5 devezh (120 €),

- Kan-ha-diskan gant Jilberzh Fulup ha Jilberzh Doñval war 5 penndevezh (50 €),

- Kentelioù brezhoneg, diouzh ar beure, war 5 penndevezh (50€),

- Ha baleadennoù, gweladennoù, divizoù... d’an abardaez.

- Evel-just e vo ivez un nebeut abadennoù raktreset diouzh an noz (prezegenn, sonadeg, ostaleri...)

Gouestlet eo ur rubrikenn a-ratozh d’ar Gouelioù-se : deuit ’ta da dañva ganeomp ar mareoù plijus kenañ-se !

· EMVOD-MEUR :

Emvod-meur bloaziek hor c’hevredigezh a oa bet dalc’het d’ar Sadorn 25 a viz Even 2011, da 18e30, er skol sonerezh gozh (bali Laenneg e Plouha).

D’ar c’heñver-se hor boa gallet :

- Ober ur bilañs eus ar bloaz a oa oc’h echuiñ,

- Prientiñ an distro skol evit an dud deuet koulz hag ar vugale...

- Komz eus ar staj : Gouelioù e Goueloù, ha reiñ brud dezhañ,

Ar bloaz-mañ e vo kentelioù brezhoneg war liveoù liesseurt, d’an euriadoù-mañ :

Live	Deiz	Eurioù	Kelenner	Lec’h	Kentel gentañ
Bugale ar skolioù	Merc’her	17e00-18e00	Herve Bonnieg	Sal Erik Orsenna	28/09/11
Deraouidi (0)	Gwener	20e00-21e30	Padrig Kelenn	Skol Sonerezh	30/09/11
1	Meurzh	20e00-21e30	Jord Gevel	Skol Sonerezh	11/10/11
1 (da zibab)	Merc’her	18e00-19e30	Jord Gevel	Skol Sonerezh	12/10/11
2, 3	Merc’her	18e15-19e45	Herve Bonnieg	Skol Sonerezh	28/09/11
Kaozeadennoù	Gwener	18e15-19e45	Fañchig Gohin	Skol Sonerezh	07/10/11
Staj daouviziek 1~3	Sadorn	09e00-12e00	Tomaz Jacquet	Skol Sonerezh	04/02/12

Ar c’hentelioù a vo er skol sonerezh gozh (bali Laenneg), Skol gentañ-derez.

Kement hini a zo dedennet a c’hallo mont e darempred war-eeun gant ar gelennerien da vare ar c’hentelioù pe bellgomz en a-raok evit gouzout hiroc'h. An deraouidi zo gortozet dreist-holl. Tu vo dezho na lakaat o anv da vat nemet goude un nebeut kentelioù ma fell dezho.

Tu vo da lakaat e anv, a-hed miz Here war al lec’h, pe diouzhtu, dre bellgomz pe dre bostel.

Trugarez da Roger Gardan (OF Plouha)

evit an holl luc’hskeudennoù-mañ...

· PREZEGENN E BREZHONEG :

D’ar Sadorn 25 a viz Even 2011, da 20e30 e oa bet ur brezegenn e brezhoneg gant Fañchig Gohin, war an dodenn : "Orin ar bezhin glas diouzh savboent ar skiantourien." Sur e oa bet deurus, ha desket e oa bet ur bern traoù gant ar selaouerien aketus...

· BEAJ DIBENN BLOAVEZH SKOL KALON PLOUHA :

Evit lidañ dibenn ar bloavezh skol 2010-2011, berzh hor skolidi-noz aketus hag ar staj a vo en hañv-mañ c'hoazh, e oa aozet gant Kalon Plouha, d'ar Sadorn 4 a viz Even 2011, un dro e Bulad. D'ar c'heñver-se e voemp degemeret er preti "Ar Ch’ty Kozh" ha, goude-se, e voe diskuliet dimp teñzorioù kuzh Bulad gant daou arbennigour eus ar vro-se : Jef Fulub ha Herri an Naour.